You are currently viewing Рўза тутишнинг инсон саломатлигига фойдаси беқиёсдир

Ниҳоят ойларнинг султони бўлмиш муборак моҳи Рамазон ўзининг таровати, саховати ва баракоти билан оламга ташриф буюрди. Маълумки, муқаддас динимизда йилда бир ой, яъни Рамазон ойида рўза тутилади.

Табобат илми мутахассисларининг фикрича, инсон бир йилда 28-32 кун ихтиёрий равишда ўзини овқатдан тийиши, оч қолиши керак. Ихтиёрий оч қолиш усули, ҳозирда одамлар орасида кенг тарқалган ўттизга яқин касалликларга даво бўлиши илмий исботланган. Бу билан йил давомида ошқозон, ичакларда тўпланиб қолган чиқиндилар ҳазм бўлади.

Одам вужуди шундай яратилганки, озиқ-овқат етказиш тўхтаган пайтда бутун куч-қувват организмни зарарли микроблар, хаста тўқималар, ўсма ва хилтлардан тозалашга қаратилади.

Араб табибларидан бири Хорис ибн Колда: “Ошқозон –  касалликларнинг уйидир, парҳезкорлик эса, барча давонинг бошидир” деган.

Чиндан ҳам рўзанинг инсон саломатлигига фойдаси жуда ҳам кўп. Илмий изланишларга кўра, рўзанинг турли жисмий ва руҳий касалликлардан ҳимоя қилиш, уларнинг олдини олишда фойдаси беқиёсдир.

Рўза инсондаги касалликларга қарши иммунитетни кучайтиради. Чунки рўза тутган одамда ушбу мақсадга хизмат қилувчи ҳужайралар ўн марта кўпайиши илмий исботланган.

Рўзадор инсон, шунингдек, турли асабийлашиш, уруш-жанжаллардан йироқ бўлади. Бу эса асаб тизимини янада яхшиланишига хизмат қилади.

Маълумки, озиқ-овқат, дори-дармон ва ҳаво орқали инсон жисмига кўплаб зарарли моддалар кириб, тўпланиб қолади. Ана ўша моддалар фақат рўза тутиш орқали чиқиб кетади.

Тажрибалар шуни кўрсатдики, рўза қонда холестерин миқдорининг камайишига, натижада юракда қон лахтаси (тромб) тиқилишининг олди олинишига сабаб бўлади.

Ҳа, рўза тутишнинг инсон организмига, руҳиятига фойдаси беқиёсдир. Бу умрида ҳеч бўлмаса бир маротаба рўза тутган одам жуда яхши билади. Ўз ихтиёри билан ўттиз кун давомида нафсини тия олиш, саломатликга ижобий таъсир кўрсатади. Замонавий илмий тадқиқотлар буни тасдиқлаган.

Шу боис очлик йўли билан даволаш тиббиётда кенг қўлланилиб, нафақат соғлиқни сақлашда, балки касалликлардан халос бўлишда ҳам рўза тутишнинг ўта зарурлиги эътироф этилмоқда. Шундай экан, саломатлигингиз кўтарса, албатта, рўза тутинг.

Барчамизга Рамазон ойи муборак бўлсин!