Президент фармони: Саломатлик ва стратегик ривожланиш институти ташкил этилди
Ўзбекистон Республикаси Президенти томонидан Соғлиқни сақлаш вазирлиги фаолиятини янада такомиллаштириш чора-тадбирлари тўғрисидаги фармон имзоланди.
Мазкур фармонга мувофиқ, Аҳолининг соғлом турмуш тарзини қўллаб-қувватлаш ва жисмоний фаоллигини ошириш маркази негизида Саломатлик ва стратегик ривожланиш институти қайта ташкил этилади.
Янги ташкил этилган институт фаолиятининг асосий мақсади — аҳоли саломатлигини мустаҳкамлаш, соғлом турмуш тарзини кенг тарғиб қилиш, касалликларнинг олдини олиш ҳамда соғлиқни сақлаш тизимини стратегик ривожлантиришга хизмат қилувчи илмий-амалий ёндашувларни ишлаб чиқишдан иборат.
Институтнинг асосий вазифалари
Фармонга кўра, институт олдига қуйидаги устувор вазифалар белгиланди:
соғлом турмуш тарзини шакллантириш;
юқумли бўлмаган касалликларга қарши курашиш ва уларнинг олдини олиш бўйича дастурларни ишлаб чиқиш ҳамда амалга ошириш;
соғлом турмуш тарзини тарғиб қилиш, зарарли одатларга қарши курашиш, аҳолининг барқарор тиббий маданиятини шакллантиришга қаратилган комплекс чора-тадбирларни ишлаб чиқиш ва амалга ошириш;
илғор ва мақбул хорижий тажриба асосида соғлиқни сақлаш тизимининг устувор йўналишлари, ўрта ва узоқ муддатли ривожланиш сценарийлари ҳамда стратегиялари бўйича илмий асосланган таклифлар тайёрлаш;
тиббий статистикани шакллантириш ва юритиш, статистик кўрсаткичларни шакллантиришда халқаро стандартлар ва методикаларни жорий этиш бўйича таклифлар ишлаб чиқиш;
тиббиёт соҳасига оид статистик маълумотларни йиғиш, қайта ишлаш, умумлаштириш, таҳлил қилиш, тарқатиш ва сақлаш ишларини такомиллаштириш.
Ходимлар учун янги имкониятлар
Фармонга асосан, 2024 йил 1 январдан бошлаб институт ва унинг ҳудудий бўлинмалари ходимлари меҳнатга ҳақ тўлаш, моддий рағбатлантириш ва ижтимоий ҳимоя қилиш шартларига кўра тегишли равишда Соғлиқни сақлаш вазирлиги ва унинг ҳудудий бошқарув органлари ходимларига тенглаштирилади.
2024–2026 йилларга мўлжалланган дастур ишлаб чиқилади
Шунингдек, Соғлиқни сақлаш вазирлиги институт билан биргаликда икки ой муддатда 2024–2026 йилларда соғлом турмуш тарзини шакллантириш, тўғри овқатланишни тизимли тарғиб қилиш ва оммалаштириш дастурини ишлаб чиқади.
Ушбу дастурда, жумладан, қуйидагилар назарда тутилади:
соғлом турмуш тарзини шакллантиришга қаратилган ҳар йили 25 тагача промо-роликлар, дастурлар ва телекўрсатувлар тайёрлаш;
уяли телефон фойдаланувчиларига касалликлар профилактикаси ва соғлом турмуш тарзи асослари бўйича ҳар куни қисқа SMS хабарлар юбориш;
журналистлар ва бошқа матбуот вакиллари ўртасида ҳар йили “Соғлом турмуш тарзи бўйича йилнинг энг яхши тарғиботчиси” танловини ўтказиш;
бозорлар, самолёт, поезд, автобус, метро, супермаркетлар ҳамда фуқаролар гавжум жойларда соғлом турмуш тарзи бўйича видеороликлар намойиш қилиш, радиомаслаҳатлар тақдим этиш ва буклетлар тарқатишни таъминлаш