Жорий йилнинг 13 июнь куни Ўзбекистон Республикаси Олий Мажлиси Сенатининг йигирма еттинчи Ялпи мажлисида Олий Мажлис Қонунчилик Палатаси томонидан 2021 йил 21 декабрда қабул қилинган “Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида”ги Ўзбекистон Республикаси Қонуни кўриб чиқилган эди.
Жорий йилнинг 7 июнда қабул қилинган “Реклама тўғрисида”ги Ўзбекистон Республикаси Қонунда табиий ва кўпикланадиган винолар билан бирга пивони чекланган тарзда реклама қилишга рухсат берилган бўлиб, кўриб чиқилаётган Қонунда эса пиво рекламасини тўлиқ тақиқлаш кўзда тутилган эди. Ушбу номувофиқликни ҳамда қатор жузъий камчиликларни бартараф этиш учун Қонун Олий Мажлис Қонунчилик палатасига қайтарилган эди.
Айни вақтда Олий Мажлис Қонунчилик палатаси томонидан Келишув комиссияси тузилиб, Қонун Сенатнинг таклифлари асосида қайта кўриб чиқилди.
Жорий йилнинг 9 август куни Олий Мажлис Қонунчилик Палатасининг навбатдаги Ялпи йиғилишида Қонун бўйича келишув комиссиясининг хулосаси кўриб чиқиш режалаштирилган.
Умид қиламизки, депутатларимиз келишув комиссияси хулосасини қўллаб-қувватлаб, Қонунни янги таҳрирда маъқуллайдилар ҳамда ёшларимизни, миллат генофондини алкоголь ва тамаки маҳсулотларидан ҳимоя қилишга ўз ҳиссаларини қўшадилар.
Соғлиқни сақлаш вазирлиги Аҳолининг соғлом турмуш тарзини қўллаб-қувватлаш ва жисмоний фаоллигини ошириш маркази